Семинарны Бүгү делегейниӊ төрээн дылдар хүнүнге тураскаадып, институттуӊ башкарыкчы эртем ажылдакчызы, филология эртемнериниӊ кандидады О.М. Саая организастап, башкарып эрттирген.
Аңаа «Сорунза» чогаадыкчы каттыжыышкынның кежигүннери, башкылар, аныяк авторлар, студентилер болгаш күзелдиг кижилер киришкен.
Аныяк авторларга солун, ханы илеткелдерни филология эртемнериниң кандидады, ТИГПИ-ниң чогаал шинчилээр секторунуң башкарыкчы эртем ажылдакчызы Людмила Мижит («Тыва шүлүк чогаалы» ), Тываныӊ чогаалчылар эвилелиниӊ кежигүнү, Тыва Республиканыӊ өөредилгезиниӊ алдарлыг ажылдакчызы Меңги Ооржак («Чечен чогаал сөзүглелиниӊ тургузуу»), Тываның чогаалчылар эвилелиниң, Россияның театр ажылдакчыларының эвилелиниң кежигүнү Эрик Норбу («Чөрүлдээ – шии чогаалының сюжединиң шимчедикчизи»), филология эртемнериниң кандидады, ТИГПИ-ниң дыл секторунуң башкарыкчы эртем ажылдакчызы Оюмаа Саая («Тыва шын бижилгениӊ айтырыглары (Амгы үениӊ интернет четкизинде сөзүглелдерге даянган)»), ТИГПИ-ниң эртем ажылдакчызы Шеңне Хомушку («Тыва литературада сатира: аргалары болгаш ужур-дузазы») номчуп берген.
Илеткелчилер Тываның амгы проза, поэзия болгаш драматургиязыныӊ чугула айтырыгларын сайгарып, боттарының чогаадыкчы арга-дуржулгазын үлежип, аныяк авторларга үнелиг сүмелерин берген. Национал дылды болгаш культураны кадагалаарының, тус черниң чогаалчыларының чогаадыкчы чоруун аныяктар ортузунга нептередириниң айтырыгларынче онза кичээнгейни угландырган.
Семинар санал-оналдар солчулгазы болгаш моон соңгааргы кады ажылдажылганың кедизин сайгарары-биле доозулган. Киржикчилер хемчегниң организакчыларынга өөрүп четтиргенин илереткеш, Тыва Республикага литературлуг чорудулганың хөгжүлдезинге ооң улуг ужур-дузалыын демдеглээннер.