Хүндүлүг өгбе чогаалчывыс, Тыва Республиканың Улустуң чогаалчызы Кара-Күске Күнзекович Чоодунуң чырык өртемчейден чарлып чорупканының дугайында хенертен келген аарышкылыг медээни чүрээвиске чоок хүлээп ап, Тываның эртемденнери – ТГТШИ-ниң коллективи чогаалчының ажы-төлүнге, төрелдеринге чогаалчыларга, бүгү тыва чонга ханы кажыыдалывысты илередип тур бис.
К.К. Чооду чогаадыкчы ажыл-ижиниң бүгү чылдарында бистиң институттуң эртемденнери-биле – Ю.Л. Аранчын, Я.Ш. Хертек, О.К. Дарыма, К.А. Бичелдей, М.М-Б. Харунова, З.Б. Самдан, У.А. Донгак, В.С. Салчак, А.А. Самдан д.о.ө. – сырый ажылдап келген. 1990-91 ч.ч. Тожунуң ивижилериниң дугайында К. Чоодунуң бижээн очерктерин чогаал шинчилекчилериниң бедик үнелээниниң түңнелинде, журналист, чогаалчы К. Чооду ТР-ның публицистика талазы-биле Күрүне шаңналының лауреады деп хүндүлүг атка төлептиг болган. Өгбе чогаалчывыстың тыва дыл, тыва чогаал, тыва төөгү, Тыва-Моол харылзаалар талазы-биле бижээн номнарынга институттуң эртемденнери сүмени, редактураны, үнелелди берип, чырыкче үндүреринге демнежип чораан.
Чогаалчының 85 хар оюнга тураскааткан З.Б. Самданның “Кайгамчыктыг Кара-Күске” деп чүүлүнде чогаалчының эрткен оруун долузу-биле чырыткан (“Шын” 2022 ч., апр. 2, 6 хүннеринде).
2025 чылда К. К. Чоодунуң төрээн тыва дылынга тураскааткан уругларга бижээн “Тываларым” деп шүлүктер чыындызын У.А. Донгак тургускаш, редакторлааш, парлалгага үндүрери-биле белеткээн.
К.К. Чооду тыва чогаал, тыва дыл, Хомду дайынының киржикчилериниң төөгүзүнүң талазы-биле институт-биле кады ажылдажылганы моон-даа соңгаар планнап, келир үеже кедергей чүткүлдүг чурттап келген. Бүгүдеге үлегерлиг өгбевистиң сыныш чок тура-соруунга Тываның эртемденнери мөгейдивис…
ТГТШИ-ниң коллективинден
2026 ч. октябрьның 8.