Хөй-ниитиниң шаңналын Тыва Республиканың аныяк эртемденнер болгаш специалистериниң чөвүлели Тыва Республиканың Чазак Баштыңының Грантызының ачызында организаастап эрттирген.
Шаңналдың кол сорулгазы — бодунуң ажыл-ижиниң, сонуургалдарының аайы-биле тыва дылды аныяк өскенге, чон аразынга нептередип чоруур улусту деткиири.
Шаңналдың тиилекчилериниң даңзызы:
1. Каа-Хемниң 1 дугаар школазының тыва дыл болгаш чогаал башкызы, Баазаң Чинчи Валерьевна – «Тыва дылды камгалаарынга быжыг туружу дээш»
2. «ЛанаСофт» компаниязының улуг программизи, тыва дылдың суртаалчызы Күжүгет Али Александрович – «Тыва таналды iOS системазынче кииргени дээш»
3. Тыва Республиканың национал хөгжүм-шии театрының аныяк артистери Айдызана Иргит база Сай-Дажы Найдан – «Тыва шүлүк уран-чүүлүн чон аразында делгередип чорууру дээш»
4. «Алдар» спорт школазының чиңгине директору, Тыва Республиканың күчүтен мөгези Кара-Сал Эрес Доржуевич – «Тыва дылда кижизидикчи ажыл кылып чорууру дээш»
5. «Чемпионнарның чүректери» деп ачы-буян фондузунуң кежигүннери Чудак Меңги Романович база Санаа Артас Валентинович – «Тыва дылда кижизидикчи ажыл кылып чорууру дээш»
6. Чөөн-Хемчик кожууннуң «Хээлер» аттыг уруглар сады – «Школа назыны четпээн чаштарның тыва дылын сайзырадырынга улуг үлүг-хуузун кииргени дээш»
7. Кызыл хоорайның 27 дугаарлыг “Угулза” аттыг уруглар сады – «Чаштарга болгаш ада-иелерге таарыштыр тыва дылга дериттинген уруглар сады дээш»
8. Сүт-Хөл кожууннуң уругларның чаартынган ном саңы – «Тыва дылда хөй сериялыг мультфильмни кылып үндүргени дээш»
9. Тыва Республиканың Морозов Петр Александрович аттыг аграрлыг лицейиниң директору Түлүш Резеда Тас-ооловна – «Өөредилге системазында хөй чылдарда тыва дылдың туружун кадагалап чорууру дээш».